Рубрыка: Кангрэс

Працягваецца прыём заявак на арганізацыю секцый і панэляў у межах Міжнароднага Кангрэса даследчыкаў Беларусі

Паважанае спадарства,

Звяртаем Вашу ўвагу, што 5 сакавіка завяршаецца прыём заявак на арганізацыю спецыялізаваных секцый (панэляў) у межах Міжнароднага Кангрэса даследчыкаў Беларусі (28-30 верасня 2012; Коўна, Літва).

Падрабязную інфармацыю аб патрабаннях да арганізацыі Вы зможаце знайсці ў прымацаваным файле Call for Panels.

Чакаем вашых прапаноў.

Міжнародны Кангрэс даследчыкаў Беларусі

Галоўная акадэмічная падзея 2011 года – Міжнародны Кангрэс даследчыкаў Беларусі

 (23-25 верасня 2011 года, Коўна, Літва)

Шаноўнае спадарства!

Рады паведаміць Вам пра заснаванне Міжнароднага Кангрэса даследчыкаў Беларусі. Кангрэс заснаваны прадстаўнікамі беларускай і літоўскай грамадскасці як штогадовае публічнае мерапрыемства, арыентаванае як на інтэлектуальную супольнасць, так і шырокія грамадскія колы Беларусі і іншых краін: экспертаў, журналістаў, грамадскіх дзеячоў, студэнтаў і г. д.

Кангрэс ініцыяваны для інтэграцыі даследчыкаў і экспертаў у палітычнай, сацыяльнай і гуманітарнай сферах, а таксама для спрыяння больш глыбокаму разуменню Беларусі ў акадэмічных і грамадскіх асяродках краін рэгіёну і свету.

Кангрэс бачыцца месцам прэзентацыі вынікаў даследаванняў, а таксама вынікаў працы навукоўцаў і экспертаў на працягу года. Акрамя гэтага Кангрэс ствараецца для абмеркавання перспектыўных даследчых і грамадскіх праектаў, абмену меркаваннямі і ідэямі, усталявання нефармальных кантактаў.

Кангрэс дазволіць правесці рэфлексію і сістэматызаваць вынікі працы даследчыкаў і экспертаў, а таксама заахвоціць практыку ўзаемнага супрацоўніцтва і камунікацыі.

Дысцыплінарны прыярытэт Кангрэса: палітычныя навукі, сацыялогія, гісторыя, інтэлектуальная гісторыя і гісторыя ідэй.

Праца Кангрэса будзе спалучаць традыцыйныя пасяджэнні спецыялістаў (у адмысловых секцыях) з супольнымі экспертнымі панэлямі і дыскусіямі па актуальным тэмам беларускай палітыкі, культуры, грамадства, рэгіянальнага і міжнароднага супрацоўніцтва.

Папярэднія тэмы для міждысцыплінарных і публічных дыскусій: рэгіянальная палітыка ў рэгіёне (Цэнтральная і Усходняя Еўропа), месца ў ёй Беларусі; савецкае мінулае ў Беларусі і рэгіёне; ВКЛ як фактар сучаснай палітыкі і культуры; “беларуская мадэль развіцця”: досвед перыяду незалежнасці.

Мяркуецца, што ў Кангрэсе прыме ўдзел больш за 100 навукоўцаў і спецыялістаў з Беларусі, Літвы, Польшчы, Украіны і іншых краін.

Кангрэс разлічаны на тры дні працы і мусіць прайсці 23-25 верасня 2011 года.

У межах Кангрэса плануецца правядзенне шэрагу дадатковых культурных і грамадскіх мерапрыемстваў (канцэрты, выставы, публічныя дыскусіі, прэзентацыі), што будзе спрыяць пашырэнню ўвагі да яго з боку СМІ і дазволіць павялічыць патэнцыйную аўдыторыю.

Асноўнымі працоўнымі мовамі Кангрэса з’яўляюцца: беларуская, англійская і літоўская (на гэтыя мовы будзе ажыццяўляцца сінхронны пераклад пленарных і сумесных пасяджэнняў). Дадатковай мовай камунікацыі з’яўляецца руская и польская. Дакладчыкі могуць прадстаўляць тэзісы і рабіць даклады на беларускай, англійскай, літоўскай, польскай і рускай мовах.

Дакладчыкі Кангрэса будуць мець магчымасць надрукаваць свае матэрыялы ў выглядзе тэзісаў, паведамленняў альбо асобных артыкулаў.